شهادة 11

الشركاء: بر أمان

تاريخ النشر:

2024

4/3/2024

 

سواق ميكروباص زنق عليا انا وصديق كنا راكبين موتوسيكل بحجة أن الدنيا زحمة ولما قولنا طيب خد بالك قال نصًا لا مش هاخد بالييا***** بعد ما المشادة خلصت وقررنا نمشي طلع ورانا وقعد يزنق علينا بالميكروباص خوفنا احسن يموتنا فوقفنا وبدأت الخناقة بعد ما شتمنا فردينا الشتيمة، طلع عكاز من الميكروباص وضربنا بيه وعور صديقي وانا ضربني بيه على ضهري ، جريت على الميكروباص بتاعه عشان كان هيمشي خلاص فا فتحت الباب ورفضت امشي وحطيت رجل جوا العربية ورجل بره ورفضت امشيه قبل ما اوديه القسم اعمل محضر بالتعدي والاصابات اللي فينا.

السواق شدني في العربية وقالي طيب وحياة امك يابنت المت*****… هاخدك معايا منطقتي في الاباجية وهتشوفي هيحصلك ايه هناك، طبعا مشي بيا بسرعة مهولة وانا فاتحة الباب لحد ما خبط الباب في عربية فاكهة في الشارع والباب اتقفل علينا بتاع الميكروباص فبدأ يشدني من هدومي وبعدين ضربني بالبونية في وشي وفتح الباب وزقني والعربية ماشية بعد ما وقعت من الميكروباص وانا بصرخ وبحفظ ارقام العربية وبرددها بصوت عالي عشان منساهاش واعمل بيها المحضر لقيت بالصدفة عربية المباحث بتلف راح ظابط المباحث اللي في المأمورية اللي بيلف طلعني ميكروباص المباحث عشان اقول اللي حصلي وانا منهارة وبعيط حكيت له اللي حصل و طلب مني اكلم صديقي وفعلا كلمته وجه وروحت القسم بالعربية بتاعة المباحث، صديقي متعور في دماغه ومجلوط من الاسفلت وجايب دم من كل حته ومضروب على دماغه بالعكاز وانا خدوني مقطوعة وعنيا وارمة من البونية.

طبعا وصلنا القسم قعدونا اكتر من ٥ ساعات في القسم عشان اعمل محضر بالواقعة قبل ما نكتب اي حاجة في الورق طلع رئيس المباحث يزعقلي لما سمع من الأمناء اللي حصل بيزعقلي انا عشان قررت افتح باب العربية وممشيش الا لما الشرطة تيجي وبيقولي انتي ازاي مش خايفة عليى نفسك؟؟؟! ازاي تعملي موقف زي ده؟ مش خايفة يخطفك؟

طب ماهو خطفني فعلا ولما قولتله ماهو خطفني فعلا ودي محاولة خطف قالي لأياماما الخطف ده لو ٣ أو ا٣ اتلموا عليكي كتفوكي وخطفوكي ، من هنا ابتديت اعرف اني دخلت حارة سد وبدأت اتوقع اللي هيحصل

نزلت عشان نكتب المحضر فوجئت أنهم نزلوا مأمورية وجابوا الواد وهيبقى محضر قصاد محضر واقواللي قصاد أقواله واحنا الاتنين هنزل الحجز لحد العرض على النيابة وصديقي مش هيتحجز عشان محامي وهيخرج بضمان محل الإقامة ويجيوا الصبح على النيابة.

طبعا قعدت اسأل ازاي محضر قصاد محضر وأنا اللي جاية اشتكي وجاية بعربيتهم وشايفني وانا نازلة من عربية المعتدي مضروبة وانتوا نازلين جايبينه بقوة ومأمورية ، ولكن مفيش اي إجابة كله تعسف من الأمناء وواحد منهم كان بيفصص جسمي وانا واقفة واحد من الأمناء كان بيتفرج عليى كل حتة في جسمي ، قولت وماله انزل الحجز بس اجيب حقي، لحد ما شوفت حجز الستات عامل ازاي ومكلبشينهم ازاي وازاي بيعملوا الستات فالحجز .

كان في ست كده محجوزة على ذمة حاجة معرفش ايه هي بتتشتم وتتضرب ومتكلبشة طبعا خوفت وقولت لاء هتنازل انا كده هتبهدل بدل المرة مرتين

وفعلا اتنازلت وطلبت محضر تنازل عشان مبهدلش نفسي وبيهدلوني جوا تحرش تاني من الأمناء ولا بتوع النبطشية.

وانا بمضي على محضر التنازل الأمناء اخدوا فلوس عشان كتبوا محضر تنازل وطبعا أهل الولد كانوا وصلوا وبدأت وصلة الابتزاز .

وفالآخر وانا ماشية أمين الشرطة قال لصديقي انت عارف لو كنت جيت لوحدك ومدخلتهاش القسم كان الموضع مشي كويس لكن طالما هي اشتكت هيبقي لازم تنزل الحجز لأن مفيش ضمانات وكلام قصاد كلام وطبعا عشان صديقي محامي فا هيمشي لكن انا اللي هقعد فالقسم

فا أصبحت عشان انا ست مش تحت أي حماية من أي وظيفة ولا اي حاجة عادي اتركن فالقسم عشان عايزة اجيب حقي ودي اخر مرة هدخل فيها قسم.

شارك:

اصدارات متعلقة

توثيق نشاط الاتحاد العام للمرأة الفلسطينية-مصر(المقدمة)
توثيق نشاط الاتحاد العام للمرأة الفلسطينية-مصر (3)
توثيق نشاط الاتحاد العام للمرأة الفلسطينية-مصر (2)
توثيق نشاط الاتحاد العام للمرأة الفلسطينية-مصر (1)
السيدة ملعقة تكتب: لن أشنقَ نفسي اليوم
العدالة البيئية النسوية: الأراضي الأميرية في لبنان مثالًا
تقرير عن مشروع قانون الأحوال الشخصية
ديتوكس العلاقات: العلاقات السامة وإزاي نتعامل معاها؟
شكل الدولة السورية ورؤية النساء السوريات حول العلاقة بين المركز و الاطراف
ورقة سياستية التعافي المبكر