ماما تحت الأنقاض

الشركاء: أنثي
ايمانا منا بالسعى نحو حقوقنا وإعلاء صوت النساء تطلق أنثى حملة ماما تحت الأنقاض بالتزامن مع اليوم الدولي للمرأة والتي تسلط الضوء على الانتهاكات التي تلاحق النساء الأمهات من أعباء الدور الإنجابي بداية من الحمل واكتئاب ما بعد الولادة الى عدم امتلاك النساء لحياتهن الشخصية ونطرح الاحصائيات العالمية التي تؤكد على الانهيار النفسي والجسدى الذى يهدد حيوات الأمهات ويصل بهن الحال فى معظم الأحيان إلى خطر الموت .,علاوة على طرح توصيات للأمهات الجدد ربما تصل بهن الى الأمان وتوصيات للأباء تصل بهم وأولادهم والنساء إلى حياة سلمية سليمة تخلو من العنف والتخلي بينما نطرح قصص من واقع الريف المصري تظهر جانب الامومة البائسة التى تعيشها المرأة بعد قرار الحمل الى جانب قلة الموارد التي يعيشها الريف ما يؤثر على صحتها الانجابية والجنسية كما نوضح أضرار وسائل منع الحمل للنساء ونتيجة لذلك فنوصي المنظومة الصحية وصانعي السياسات في الدولة ببعض الإرشادات التي من شأنها تحسين أوضاع النساء فى مصر. حمل أنفرادي معظم الستات وقت الحمل بتحس أنها مسجونة جوه حملها لوحدها ومهما كان الراجل متعاون ولطيف هو فى النهاية بيكون مش شايل عبء الحمل لانه شايف الدور من البداية للنهاية دور الست ومش دوره علاوة على أن الستات فى الريف فى وقت الحمل بتشيل أعباء تانية كتير غير حملها و آلامها الجسدية والنفسية ..الأعمال المنزلية لبيت العائلة وعملها الغير مدفوع الأجر اللى ممكن يكون فيه مشقة سفر كل يوم لأن مطالب منها انها تبيع المنتجات اللبنية اللى تصنعها والستات فى المجتمع الريفي بيتم معايرتهن لو ست بينت أنها تعبانة ومش قادرة على مشقة الحمل لانهم بيكونوا منتظرين منها طفل واتنين وثلاثة وياريتها تقدر تحدد حتى هى حتقدر تخلف كام مرة وفيه ستات كتير بتحمل وهى عارفة انها بتعرض حياتها للخطر لكنها بتجبر على الحمل بشكل غير مباشر وأحيانا بشكل مباشر., أكبر خطر بتقابله ستات الريف ساعة الحمل ان مش كلهن يقدروا يتابعوا حملهن وده لأن حرية الحركة مش رفاهية عند ستات الريف كمان موارد المناطق الريفية بتكون ضعيفة في المتابعة والأدوية مش بتكون أفضل شيء ناهيك بقى على عدم أعتراف الأسر الريفية والغير ريفية بأن حالات الستات النفسية بتسوء شهور الحمل وفى معظم الأحيان ما حدش بيقدم للستات الدعم الكامل وبيكون الدعم الوحيد أنها ممكن تترحم من بعض الأعمال المنزلية لو فيه ستات تانية فى نفس الأسرة .,غير أن القلق والتوتر بيفضل ملازم الستات الريفيات لحد ما تعرف هى حامل فى بنت ولا ولد لان ده فى الريف لسه مسألة مهمة بيتوقف عليها لوم الستات أو هجرهن أو عقابها للاستعداد للحمل الثانى دون فترة راحة من الحمل الاول إكتئاب ما بعد الولادة الحمل عملية مرهقة بتمر فيها الستات بتغيرات هرمونية وجسدية وعاطفية ونفسية وبعد الولادة معظم الأمهات بتمر بمشاعر مختلطة بين الفرح والحزن ونوبات البكاء المستمرة خلال الأسبوعين الأولين بعد الولادة ما يعرف بالكأبة النفاسية وبيستمر اكتئاب ما بعد الولادة غالبا لفترات طويلة بأشكال مختلفة بتأثر على الأم والطفل زى الشعور بالحزن واليأس وعدم القدرة على التمتع بأى شىء مبهج والتعب ونقص الطاقة وضعف التركيز أو مدة الانتباه وانخفاض مستوى احترام الذات والثقة بالنفس والنوم المتقطع حتى عندما يكون الطفل نائما وتغير الشهية وللاسف الستات عموما وفى الريف تحديدا بتخاف تعترف بآلامها النفسية والجسدية لانها بتكون محاطة باللوم من العائلة وبتخاف من هجر زوجها ليها ومن نقص الدعم اللى وارد جدا أنه يطول فترات أكتئابها كمان الاساءة الزوجية الجنسية و اللفظية والجسدية عامل أساسى أن فترة الاكتئاب دى تكبر وقلة النوم اللى كل الستات بتعانى منها فى الشهور الأولى بعد الولادة والرضاعة الطبيعية اللى كتير من الستات طول فترة الحمل بتكون مقررة أنها تكون غذاء رضيعها وفجاءة لمشكلات صحية خاصة بيها بتلجأ للرضاعة الصناعية ده بيأثر على نفسيتها و تكون عرضة للأكتئاب أكثر من الستات اللى ما خططتش أصلا للرضاعة الطبيعية كمان تعليقات الاهل والجيران والأقارب والتنظير دايما على طريقة الأم فى كل حاجة بتقدمها لطفلها ده بيأثر بالسلب على الام والطفل تعانى 1 من كل 10 نساء من أكتئاب ما بعد الولادة 1 يستمر أكتئاب ما بعد الولادة من 3 أشهر الى 6 أشهر وممكن يطول لسنين كتير 50% من الأمهات اللى عندهم أكتئاب ما بعد الولادة لم يتم تشخيص حالتهن عند طبيب 50% من النساء اللواتى يعانين من أكتئاب ما بعد الولادة بدأن يعانين من الاعراض أثناء الحمل 80% من النساء المصابات بأكتئاب ما بعد الولادة سيحققن الشفاء التام النساء اللائى لديهن تاريخ من الاكتئاب عرضة لأكتئاب ما بعد الولادة بنسبة 30% 75% من الأمهات المصابات باكتئاب ما بعد الولادة لديهن علامات أضطراب القلق يحدث أضطراب الوسواس القهرى بعد الولادة ل3% الى 5% من النساء 25% الى 75% للنساء اللواتى لديهن تاريخ سابق من الوسواس القهرى وعند تطور أعراض الوسواس القهرى فانها تستمر لمدة 6 شهور على الاقل 7% من الأمهات بعد الولادة تصاب بأضطراب الهلع 30% من الأمهات تعرضن لمضاعفات أثناء الحمل والولادة ويستوفون معايير جزئية لأضطراب ما بعد الصدمة ما بين امرأة وأمرأتين من كل 1000 امراة تصاب بذهان ما بعد الولادة النساء اللاتى لديهن تاريخ من الاضطراب ثنائى القطب أكثر عرضة بنسبة 40% للاصابة بذهان ما بعد الولادة 10% من حالات ذهان ما بعد الولادة تؤدى الى الانتحار   أهم روشتة لكل ست لازم تمشي عليها بعد الولادة التأكد أن الأم بيتقدم لها بعد الولادة الدعم زى النوم الكافى بالتناوب مع الأب وتناول الوجبات اليومية كاملة وأخذ قسط من الراحة والاعتناء بالذات العلاج النفسي والمتابعة مع متخصص بالصحة العقلية لكيفية التعامل مع مشاعرها والتحدث حول الخيارات الأفضل سواء كان الدواء أو جلسات الدعم النفسى الحديث مع الامهات اللى مروا بنفس التجربة عن المشاعر اللى مروا بيها وازاى اتعاملوا معاها لازم الأمهات تكون لطيفة مع نفسها وما تدايقش لو مالبتش كل التوقعات اللى هى منتظراها لكونها أما وما تقلقش لو ما نفذتش شىء كانت مخططة له زى مثلا انها كان نفسها ترضع طبيعى وما قدرتش او حصلها ظرف صحى ما تفكريش لدرجة الارهاق والتعب فى شكل المسؤولية وازاى حتقدمى لطفلك الدعم الكافى كأم تحديدا فى الاسابيع الأولى من الولادة الطفل بيكون محتاج متطلباته الشخصية بس والتواصل بيجي بعدين مش مسؤوليتى لوحدى (الحمل الخطأ) بعد الولادة بيبتدى خطر الحمل الخطأ يقلق ويوتر معظم الستات وبعدها بيبتدى مشوار وسائل منع الحمل اللى بقى أمر واقع انه يكون مكتوب على الستات فى مصر لأن مش متوافر فى بلدنا أى وسيلة منع حمل للرجال غير الواقى الذكرى وده اللى كتير بيتبعه ولكنه مش وسيلة أمنة وعملية قطع الحبل المنوى وده بيخلى رجالة كتير ترفض انها تساعد الستات فى أتباع وسائل منع الحمل وبيكملوا على أنه دور الست ومسؤوليتها وده بيخلى الستات تيجي على نفسها وتتبع وسائل منع الحمل زى الحبوب وأنواعها وغرسة منع الحمل واللاصقات وأبرمنع الحمل واللولب بانواعه والحواجز المهبلية وغطاء عنق الرحم والواقى الانثوى وعملية ربط المبايض فوفقا لتقديرات الامم المتحدة هناك ما يقرب من 62 مليون أمراة فى العالم تستخدم وسائل منع الحمل الفموية (الحبوب) ولأستخدام الستات للوسائل دى له فوائد صحية زى أنه بيقلل من خطر الاصابة بفقر الدم و باكياس المبيض الوظيفية وأمراض الثدى الحميدة ويقلل الاصابة بمرض التهاب الحوض كما يقلل خطر الاصابة بسرطان المبيض وسرطان بطانة الرحم وكمان له اضرار فى الاستمرارية فى أستخدامه زى أمراض القلب والاوعية الدموية وخطر الاصابة بالجلطات الدموية الوريدية واحتشاء عضلة القلب والسكتة الدماغية وأحيانا الوفاة للنساء فوق 30 عاما حيث أن ترتبط أمراض القلب والاوعية الدموية أرتباطا مباشرا بمحتوى الأستروجين والبروجستين ولو حنختار من وسائل منع الحمل حنفضل نجرب مع استشارة الطبيب لحد ما نتبع وسيلة حمل مناسبة مع جسمنا لأن مش كل الستات تنفعها نفس الوسائل كل جسم وله ظروفوه بس السؤال هنا ليه الستات دايما هى بتلبس والرجالة بتقدر تخلع لان المجتمع دلع الرجالة واداهم امتيازات تخليهم يقدروا يخلعوا من خلالها على شان كدا اهتمى وانتى بتتبعى علاج الحبوب كوسيلة امان لمنع الحمل انك تتابعى استشارة طبيب النسا على شان تقدرى تعملى تحاليلك فى مواعيدها بدل ما نلبس اكتر ولو مركبة لولب اهتمى انك تعملى سونار وتتابعى واوعى تنسي ان فى جسمك قطعة معدن ودى حاجة مش سهلة ابدا وحقك انك تطلبى من شريكك أنه انتى مش حينفع تتبعى علاج الحبوب لانه على المدى البعيد حياثر على حياتك ويهدد صحتك بالخطر هو كمان شريك فى أنه توزعوا مسؤلية وسيلة منع الحمل عليكم ولازم تقدرى أن لو الموضوع حيقف عليه مصيرك يبقي وجب عليه قطع الحبل المنوى وسائل منع الحمل أسهل على الرجالة الواقى الذكرى دى الوسيلة اللى معظم الرجالة فى مصر بتستخدمها لمنع الحمل وهى فعالة بنسبة 98% مهمتها بتمنع وصول الحيوانات المنوية الى البويضة ومتوفرة فى اى صيدلية وسعرها مناسب كمان بتحمى الطرفين فى العلاقة الجنسية من الامراض الوارد انها تتنقل زى مرض السيلان والكلاميديا ونقص المناعة البشرية ومالهاش أى أضرار مناسبة لو فيه رغبة فى الحمل بعد كدا قطع القناة المنوية هى عملية بسيطة والتخدير بيكون موضعى وبتخلص فى 15 دقيقة وبيتم اجراء تحليل للسائل المنوى بعد العملية على شان الطبيب يتأكد أن مافيش اى حيوانات منوية فى السائل وهى بديل لعملية التعقيم للنساء لانها بتكون أدق وبتأثرعلى مستويات الهرمونات عندها وبتفضل طول حياتها تعانى انما عملية قطع القناة ما بتأثرش على مستويات الهرمونات لدى الرجال مهمتهااغلاق الانابيب التى تحمل الحيوانات المنوية حتى يصبح السائل المنوى خالى من الحيوانات المنوية مناسبة لو قررنا كفاية حمل وخلفة ونفوق لنفسنا بقي مين الستات الممنوعة من حبوب منع الحمل ؟؟ ستات كتير بيكون صعب عليهن اتباع وسيلة منع حمل لفترات فى حياتها نظرا لظروفها الصحية وخاصة حبوب منع الحمل المركبة الستات اللى عندها تاريخ للجلطات الدموية او اللى عندها تاريخ للاصابة بالسكتة الدماغية أونوبة قلبية أومرض القلب التاجى أو سرطان الثدى أو سرطان عنق الرحم أو المهبل أو الستات اللى بيجيلها نزيف مهبلى غير مبرر أو اللى بيحصلهن يرقان (اصفرار بياض العين أو الجلد) أثناء تناول الحبوب أو أثناء الحمل أو اللى بيعانوا من ورم الكبد والحمل المشتبه به أو لو كانت بتخطط لعملية جراحية أو مريضات ضغط الدم والسكرى أو مريضات الذئبة ومن يزيد عمرها عن 35 سنة (هاااام) يجب الا تتناولى حبوب منع الحمل التى تحتوى على البروجستين فقط اذا كنتى تعانين من مشاكل فى الدم احصائيات أستخدام النساء المصريات لوسائل منع الحمل %59من النساء المتزوجات يستخدمن (اللولب والحبوب والحقن ) %3 يستخدمن الطرق التقليدية %41 من النساء منذ عام 2014 لا يستخدمن وسائل منع الحمل %21 من النساء اللائى تتراوح اعمارهن بين 15و19 عاما يستخدمن وسائل منع الحمل %73 من النساء اللائى تتراوح اعمارهن بين 35و39 لا يستخدمن وسائل منع حمل %2من النساء اللائى تتراوح اعمارهن بين 15و49 عاما يستخدمن وسائل منع الحمل قبل الحمل الاول _ليه لازم أمشى على فيتامينات مكثفة بعد الولادة ؟! بعد الحمل والولادة اجسام الستات بتسنفذ معظم العناصر الغذائية فى الجسم زى حمض الفوليك وفيتامين د والحديد والأحماض الدهنية والسيلينيوم والكالسيوم ولو كنتى بترضعى طفلك طبيعى فلازم الفيتامينات تكون أكثر من اللى كنتى بتاخديها ساعة الحمل لأن الرضاعة حتاخد كل فيتامين فى جسمك توصله للطفل عن طريق اللبن زى فيتامين( أ وب1وب2وب6وب12) وحمض الدوكوساهيكسانويك والكولين واليود _ ماذا يفعل الرجال الأسوياء ؟! أنك تشيل مسؤولية تربية ولادك وان يكون فيه علاقة انسانية بتجمعكوا وفيه اهتمامات بتعملوها سوا بتحقق انسانيتك وبتخليك ليك دور فى انك تبنى حياة طفلك من وجهة نظرك لما كنت طفل وبتتفادى أخطاء كتير عملها اهلك بغير قصد معاك وبكدا تكون حاولت تحقق المعادلة الصعبة أنك تحاول تشوف نفسك أب عظيم وتوصل بطفلك انه يطلع سوى نفسيا لو قمت بدورك تجاه نفسك فى مسؤولية تلبية احتياجاتك الشخصية جوة البيت (زى انك تغسل هدومك او تأكل نفسك ) دى حتحسسك بالرضى عن نفسك مش حتحسسك بالذنب مع أسرتك لو شريكتك بتقدم لك خدمة فى الاعمال المنزلية ما تلزمهاش بتحديد وقت لانجاز احتياجاتك لان ده مش واجب عليها ده دورك انت وهى وارد جدا تكون مضغوطة فى حاجة خاصة بيها والزامية بالنسبة لها زى عملها او دراستها او علاقتها بأفراد عائلتها) أنك تساعد شريكتك فى أنها تعدى صدمة اكتئاب ما بعد الولادة وتكون مسؤولية وصولها للشفاء التام مهمتك حتى لو هى بتتعامل مع داعم نفسي ولازم تكون فاهم ان تغيير البامبرز والرضاعة الصناعى ومتابعة طفلك مش رفاهية بالنسبة لك ولا الدور ده خاص بالام لوحدها ده دور تشاركى فى حياة المفروض انها تشاركية انك تشوف ان وسائل منع الحمل مسؤولية مشتركة بينك وبين شريكتك _ البيان الختامى تختتم أنثى اليوم حملة #ماما_تحت_الأنقاض والتى سلطت الضوء على أكثر المشاكل التى تواجه النساء الامهات فيما يتعلق بصحتهن النفسية والانجابية وحاولت أنثى وضع بعض الحلول التى من شأنها ايجاد فرصة انقاذ للنساء أثناء الحمل وبعدالولادة وما تحتاجه أجسادهن من الفيتامينات التى تعوض الجسم عن ما يتم أستنفاذه فى الحمل والولادة والرضاعة وأكدنا على أن زيارة الطبيب النفسى أثناء الحمل ليست رفاهية انما من الأساسيات التى تحميكن من خطر الموت فى بعض الأحيان كما عرضنا أضرار حبوب منع الحمل على النساء بعد سن ال35 وذكرنا وسائل منع الحمل الأمنة التى يجب ان يتبعها الرجال بالتناوب مع النساء كلا حسب حالته الصحية كما عرضنا جزءا من السلوكيات التى يجب على الرجال أتباعها وخاصة أيام الحمل والولادة ومن خلال حملة ماما تحت الانقاض ندعو جميع النساء بوجه عام ونساء الريف بشكل خاص أن يسمعن الى أجسادهن ونفسيتهن وتجارب السابقات ولا يهلكن أجسادهن فى مرات متعددة للحمل والولادة حيث انها من أصعب وأقسى التجارب التى تمر بها أجساد النساء ونفسيتهن ، وللحديث بقية. مصادر 1- مصدر الاحصائيات https://cutt.us/5g1sy
شارك:

اصدارات متعلقة

اغتصاب وقتل طفلة رضيعة سودانية في مصر
نحو وعي نسوي : أربع سنوات من التنظيم والتعليم السياسي النسوي
شهادة 13
شهادة 12
شهادة 11
شهادة 10
شهادة 9
شهادة 8
شهادة 7
شهادة 6