زلموكة حمام عيسوي !!

زلموكة حمام عيسوي !!

رن هاتفي المحمول: الحقيني يا أستاذة.. أنا في القسم مضروب ومتبهدل.. نفخونی یا متر.. إسبقيني على النيابة.. اهدى ياعيسوي .. إيه اللي حصل يا بني .. نيابة إيه ؟!

وقبل أن ينقطع الاتصال خرمت طبلة ودني طرقعة ميرى .. غالبا كان أمناء الشرطة والمخبرون يحاولون اقناع عيسوي أن الإيد لوحدها ممكن تسقف بس على قفاه!

توجهت إلى النيابة لاجد أسرة عيسوى في انتظار عربة الترحيلات التي جاءت وبصق شكمانها في وجوهنا جميعا سحابة عادم تكفى لإبادة فيلق مارينز امريكاني. وإندفع منها بعض أفراد الأمن“المعصعصين” ممسكين بعيسوى (المكلبش) من حزام بنطلونه فبدا وكأنه خارج لتوه من تربة مصفحة هاربا من الحساب ..

تعرفت على ملامح عيسوى بصعوبة بالغة لأن وشه تقريبا كان شديد الشبه بقفاه يتكبد مرارة الالتهاب والاحمرار والازرقاق وتنبعث من تجاعيده حرارة الحياة والأحذية التي تركت آثار نعالها على بشرته الداكنة.

– مين يا بني اللي عمل فيك كده ؟

حمامی يا أستاذة.. كانوا عاوزين يعدموه ويهدوا البرج على دماغ أمي قلتلهم يا إخوانا أنا عضو في المدعوق ده اللي اسمه الاتحاد المصري لسباق حمام الرسايل وعندي سلالات نادرة وعزيزة ومعايا كارنيه عضوية وشهادة رسمية من الاتحاد واللجنة القومية العليا لمكافحة انفلونزا الفراخ بتقول إن ممنوع إعدام السلالات النادرة دى أبدًا .

بس موظفين الحى الله يحرقهم ودن من طين والتانية من سباخ وشرطة المرافق إللى معاهم افتكروا إن وشى كشك مخالف فقالوا يزيلوه!

اندهشت من خفة دم هذا البائس وقلت له: انت يا عيسوى ليك نفس تهزر .. يا بني وشك بقى مناطق عشوائية ومليان مطبات وحفر .. مين اللى فحتك كده ؟!

أمين الشرطة ضربتي في وشي بالجزمة وبعدين لسعني بالشلوط على قفايا وقالي حتشيل البرج يعنى حتشيله يابن بنت مرات الأسد انا قلت كده يبقى جدى ملك الغابة وعلى جثتى وجثة أمي .. وماقدروش يهدوا البرج وأخدوني وعملولي محضر مقاومة سلطات حجم عائلي.

مضت ساعة وعيسوى يدخن سجائره قلقا على حمامه .. ودخلنا سويا إلى وكيل النيابة الذي رحت أشرح له بحماس وبحسن نية عناصر جريمة استعمال القسوة الواقعة على موكلي وضرورة إخلاء سبيله وعرضه قانونا على الطب الشرعي لإثبات إصاباته !!

ففوجئت بعيسوى يقاطعني قائلا: شوية إنت يا أستاذة …

ونزع عيسوى من جيبه صوراً فوتوغرافية التقطها بنفسه للحمام الذي يمتلكه واستلم ودان الوكيل:

شوف يا باشا منقارة جميل إزاى.. بص الجناح متحنتف ومتساوی ربانی ازاي .. ركز سعادتك ياباشا في زلموكة الحمامة الإيراني دى بص مقلوظة وملفوفة إزاى … معلوم سعادتك .. أصل زلموكة الفرد الايراني تفرق كتير عن زلموكة الفرد اليمني.. والمصحف ياباشا الجوز ده جابلي ٤٥٠٠ جنيه بس أنا رفضت أبيعه.. ما هو إزاى أبيع لحمى؟ وبعدين الحمام ماله ياباشا بدور البرد اللي سارح بين الفراخ والبط والخنازير اليومين دول.. وبعدين الفراخ عندها شويه رشح ندبح الحمام السكر سنترافیش ده ليه مش بذمتك ده إفترا باباشا.. أنا اموت لو عدموه !

تماسك وكيل النيابة بعد كركعة ضحك مجلجلة وقال له متعاطفاً بعد نهاية التحقيق: بس إنت يا عيسوى منهم بالتعدى على موظفين عموميين أثناء تأدية عملهم وعورت أمين شرطة!

أعوره از ای يا باشا وبصمات نعل جزمة سعادته لسه على فيش وتشبيه وشي.. إرفع سعادتك البصمات عشان تتأكد!

خرجنا من غرفة الوكيل المندهش من علاقة العشق الساخنة التي تربط عيسوى بزلموكة حمامه النادر لنفاجأ بأن عيسوى إتهبد أربعة ايام على ذمة التحقيق وراح يوصی شقیقه عاشور وهو يرحل بكلبشاته في (تربة) الترحيلات أن يهتم بالحمام ويشيل (البيبيه) من تحته ويقص ضوافر الحمامة النوبي الدكر علشان ما تعورش نفسها !

وخرج عيسوى بكفالة مالية باهظة من محبسه بعد أربع ليال من المعاناه والبراغيث لابس قضية جامده جدا ووجهه يحتاج إلى ترميم وسفلتة وتقريباً ٤٢ عملية تجميل مشتاقا إلى رائحة براز حمامه الذي حلم به في محبسه وهو يحتضنه نائما معه في العشة يمارسان الملاغية والملاعبة !!

وعاد موكلى إلى منزله ليجد أم عيسوى تنتظره بابتسامة عريضة وحضن دافئ ورائحة شواء معتبرة .

انا متوفى من التعب والجوع يا أمه …

يا ضنايا يا بنى أنا عملت حسابي ودبحتلك العشر إجواز الحمام بتوعك وحشيتهملك فريك ومرتة وعزمت إخواتك البنات وإجوازهم الفرحانين برجعتك بالسلامة!!

طب عيسوي على أقرب كنبة صارخا قبل الدخول في غيبوبة سكر طويلة:

وعملتى إيه فى زلموكة الحمامة الإيراني يا أمه؟!!