20-4-2024
روان محمد..عروسة المحلة..بنت عندها 22 سنة اتجوزت أحمد بعد قصة حب جميلة، وبعد فرحها بسنة ونص بدأت شوية مشاكل تحصل بينها وبين جوزها علشان كانت بتغير إنه بيتأخر عليها بالليل وهوه راجع البيت، مكانتش بتحكي حاجة لأبوها لكن كانت بتحكي لأخوها الوحيد ان جوزها كان بيعنفها ويضربها لما بتواجهه بشكوكها.
وفي يوم اتفاجئ والدها بتلفون من القسم إن بنته اتقتلت على إيد جوزها، اللي ضربها بالسكينة علشان اتخانقوا لأنها بتغير عليه وكانت شاكة إنه بيخونها. اتقبض على المتهم إللي قال إنها كانت لحظة غضب ومكانش قاصد يقتلها بالسكينة، أبوها ماستحملش الخبر ومات بعدها بفترة من حزنه على بنته، لكن الوجع الأكبر كان من أخوها، اللي قرر يتنازل عن القضية صفته الوريث الوحيد وتصالح مع المتهم ورفض ياخد حق أخته الوحيدة.. علشان محكمة الجنايات الكبرى بالمحلة تحكم على الزوج القاتل إمبارح “بسنتين” سجن!
سنتين سجن بس في جريمة قتل! يعني أي حد يتخانق مع أي حد يضربه بالسكينة ويقتله ويقدر يخرج منها بأقل خساير لو تصالح مع أهل الضحية؟؟؟
روان أخدت طعنتين نافذتين، واحدة في بطنها من جوزها، والتانية في ضهرها من أخوها اللي ضيع حقها.
اصدارات متعلقة
- الناشر: جمعية البحرين النسائية