لا مساومة
أول الخسران
أول الخسران.. خديعة النفس
المرة ديه وبس
عشان…
لكن.. مهما ترص الأسباب
الصوت الجواني ما بيبطلش الهمس
كداب.. كداب.. كداب
تنقسم اتنين
وتعيش طول عمرك نص.. ونص
أول الخسران
مقايضة صغيرة
نتفة من روحك تتقدم قربان
لجلن تتقدم خطوة في الصف
أو تتفادي الريح العاتي
وقت الطوفان
وتهرب م الخطر
كسبت أو خسرت
الخرم في الروح انحرف
وخرم جنب خرم
الروح تنكسر
تبقى اللى ما كنتوش قلبها
وتنقهر
تستغرب صورتك في المراية
يلبد علي كتافك عفريت الحكاية
يسوقك بالعصاية..
ومن غير جزر
شارك:
