قانون الأحوال الشخصية
سؤال وجواب
القانون للجميع
–
القانون للجميع
سيدتي كثيرًا ما يصعب علينا اتخاذ قرار هام في حياتنا، ويكون واحد من أهم أسباب صعوبة اتخاذ القرار هو عدم معرفتنا بالقانون الذي ينظم حياتنا،
سنقدم لك سيدتى أهم التساؤلات التي تسأل عنها النساء في حال الزواج وفي حال استحالة العشرة والرغبة في انهاء عقد الزواج،
س : هو يعني ايه جواز عند المأذون وهو فيه جواز غير كده؟
ج : الجواز عند المأذون هو الجواز المعترف بيه “الرسمي” يعني المأذون بيكتب الكتاب ويطلع قسيمة الجواز ,، نسخة للزوج ونسخة للزوجة،، ولازم قبل ما يكتب يتأكد من موافقة العروسة ويبعت لها الشهود يتأكدوا من موافقتها،، ويشوفها هاتوكل مين في كتابة الكتاب،، وده لما تبقى العروسة بكر إنما لو كانت سبق لها الجواز ممكن تجوز نفسها،، كمان لازم يكون فيه مهر مكتوب في القسيمة جزء منه تاخده العروسة مقدم،، والباقي يبقى مؤخر صداقها،
أما الجواز اللي مش بيبقى عند مأذون فده اسمه جواز عرفي والست فيه مش بيبقى لها أي حقوق،، يعني بتضيع حقوقها اللي هيه المهر والمؤخر والنفقة, وفي الغالب يتتبهدل قوي كمان،
س : طيب هو ينفع البنت تتجوز امتى ؟
ج : ما ينفعش المأذون يكتب كتاب البنت إلا إذا كانت تمت 18 سنة بالتمام والكمال،، وده اللي عمله القانون عشان حماية البنت ،، وما يجوزوهاش وهي لسه مش عارفة يعني إيه جواز ولا شيل مسئولية وفتح بيت ،، وكمان عشان ما نحرمهاش من التعليم عشان تعرف تربي ولادها وتقدر تشتغل وقت ماتحب،
س : أنت قولتي أن ببقى فيه مهر يعني ايه ؟
ج : المهر دة الفلوس اللي بيدفعها العريس هدية للعروسة عند الجواز،، وممكن ما تبقاش فلوس،، يعني مثلاً أي حاجة تانية كهدية زي شقة،، أرض ،، أي حاجة ،، لكن اللي الناس واخده عليه دلوقتي الفلوس ،، وممكن يندفع المهر اللي بتتفقوا عليه كله مقدم ،، يعني عند كتابة الكتاب،، وممكن جزء منه مقدم والباقي مؤخر ،، زي اللي بيحصل في أغلب الجوازات دلوقتي،
س : طب والمؤخر ده الست تاخده امتی؟
ج : بتاخد الست المؤخر لو جوزها طلقها من نفسه كده،، أو لو هي رفعت قضية طلاق عشان جوزها بيبهدلها وكسبتها وده اسمه الطلاق للضرر،، أما لو جوزها لا قدر الله مات ،، يكون المؤخرده دين ،، لو فيه ورث بتاخده الأول قبل ما يتوزع الورث ،، إنما لو جوزها مات قبل الدخلة تاخد نصف المهربس،
س : وهو ينفع أشرط على جوري شروط في القسيمة ؟
ج : أيوه ينفع أن الزوجين يتفقوا على بعض الشروط وتتحط في قسيمة الجوار ،، زي شغل الزوجة ،، أو موافقتها قبل جوازه من واحدة تانية ،، أو حقها إنها تتطلق نفسها منه (وده اللي بيسموه العصمة في ايديها) أو إنها تكمل تعليمها أو أي شروط يتفقوا عليها،
س : أمال الجواز العرفي الست بيبقى من حقها ايه؟
ج : الست في الجواز العرفي ،،رغم انه ممكن يبقى شرعي أحيانًا،، إلا إنها مش بيبقى ليها حقوق خالص ،، بس ممكن إنها ترفع دعوى إثبات طلاق ،، أو إثبات زواج ولو جه ولاد تتقيد الأطفال باسم أبوهم ،، لكن أنا عايزة اقولك إن في أوقات كتير بتضيع ورقة الجواز العرفي من الست ،، أو الراجل بياخدها منها ،، وده معناه انها بتتبهدل أكثر خاصة لو ولدت وحبت تقيد ابنها هاتدخل بقى في قضية نسب وسنين من البهدلة،
س : طيب أنا باسمع أن حد طلق مراته وبعدين راح ردها من غير ما هي تعرف هو ده ينفع؟
ج : الست لما تتطلق بيبقى لها فترة عدة إللي هيه في الشرع مدة ثلاث حيضات ،، وعمومًا الناس بتحسبها تلات شهور ،، وفي المدة ديه هي بتبقى لسه على ذمة جوزها ،، يعني يقدر يرجعها تاني في أي وقت قبل فترة العدة ما تخلص،انما لو خلصت عدتها ،، فعشان يرجعها لازم توافق ويعقد عليها من جديد ،، بس ده في حالة الطلاق الرجعي ،، يعني لما تبقى الطلقة الأولى أو الثانية ،، أما لو طلقها الطلقة التالتة فمينفعش خالص ترجعله ،، عشان كده لو مات الزوج ومراته لسه في فترة العدة ،، يعني طلقها قبل ما يموت انما عدتها ما خلصتش ،، بتورث فيه نصبها زي ما الشرع قال،
س : أمال امتي بقى جوري لو طلقني ما يقدرش يرجعني غير لما أوافق ؟
ج : لو جوزك طلقك وعدت فترة العدة ما يقدرش يرجعك إلا لما توافقي ،، وساعتها يتعمل عقد جديد ،، لكن ده في الطلقة الأولى والتانية ،، أما الطلقة الثالثة ،، ما ينفعش خالص يرجعك إلا لو اتجوزت غيره ،، ولا قدر الله اطلقت منه ،، وكمان لازم موافقتك على الرجوع لجوزك لو انت شارطة في القسيمة أن من حقك تطلقي نفسك وطلقت نفسك ،، عشان ترجعيله ،، لازم توافقي ،، ومش بس كده ،، كمان لو بريتي جوزك عشان يطلقك ،، أو رفعت قضية طلاق وكسبتها ،، أو حتى رفعتي قضية خلع في كل الحالات ديه لازم توافقي عشان ترجعيله،
س : وايه الفرق بين قضية الخلع والطلاق؟
الخلع زي الطلاق على الإبراء ،، الفرق أن الطلاق على الإبراء بيبقى عند المأذون ،، وبالاتفاق ،، وما يترجعيش المهر للزوج ،، أما الخلع فهو طلاق على الإبراء لكن بحكم محكمة ،، وفي الحالة دي بترجعي لجوزك مقدم المهر اللي انت خدتيه ،، وبتطلبي الطلاق عشان كارهة العيشة معاه ،، ومش مطلوب منك تقولي ليه ولا تثبتي أسباب كرهك لعيشتك معاه ،، وده معناه كمان يبقى مش من حقك تطالبي بنفقة عدة ،، ولا متعة ولا مؤخر صداق ،، ولازم تاخدي بالك ان في الخلع المحكمة لازم تتدخل عشان تصلح بينكم،، وده كمان بيتثبت في الورق،، وهي بتحاول تصلح بينكم مرة واحدة لو ما عندكوش أولاد،، ومرتين لو فيه أولاد،، وبتنهي المحكمة محاولات الصلح ديه في خلال ستين يوم بكتيره،
أما التطليق فهوه بالمحكمة برده ،، بس لازم يبقى عندك سبب لطلب الطلاق،، وتثبتي ده ادام المحكمة،، وكمان لازم المحكمة تقتنع بيه،
س : وفي الخلع أنا بتنازل عن العفش ؟
ج : عفشك اللي مكتوب في القائمة مالوش دعوه بالخلع ده يعتبر كده زيه زي وصل الأمانة ،، يعني الراجل يا يرجعلك عفشك يا يتحبس ،، والقايمة دى بيكتها أهل العروسة عند كتب الكتاب ،، فيها كل مقتنيات الزوجة والعفش،
س : وأنا لو مش عايزة أتنازل عن حاجة وعايزة أطلق للضرر أقدر أعمل ده امتی؟
ج : في الحالة ديه لازم ترفعي قضية طلاق للضرر ،، والضرر هنا يعني مثلاً أن جوزك دايمًا بيضربك وبهينك ادام الناس ،، أو سايب البيت ومش قاعد فيه ،، أو ما بيصرفش عليكي وعلى البيت ،، وكمان لو راح اتجوز عليك واحدة تانية وده سببلك ضرر ،، أو انه صدر عليه حكم نهائي بالحبس ثلاث سنين أو أكثر ،، بس في الحالة ديه ما تقدرش ترفعي القضية غير بعد ما يعدي سنة على حبسه ،، وطبعًا في كل الحالات ديه لازم انت اللي تثبتي الضرر اللي حصلك واللي مخليكي مش مستحملة العيشة معاه ،، وكمان لازم القاضي يقتنع بالأسباب اللي قولتيها،
كمان تقدري تطلبي الطلاق لو جوزك مصاب بعيب بدني ،، أو عقلي مش هايشفى منه ،، أو عايز زمن طويل في العلاج ،، وفي الحالات ديه إثبات الإصابة أو المرض بيبقى من خلال الدكاترة والمستشفيات،
س : وهو أنا لو اطلقت ،، جوزي ملزم يوفرلي شقة؟
ج : طليقك من ملزوم يجيبلك شقة تقعدي فيها بعد الطلاق ،، لكن لوفية أطفال ،، هو ملزم يجيب شقة للحضانة ،، وانت باعتبارك حاضنة لأطفالك من حقك انت وأطفالك تقعدوا لوحدكم في شقة الحضانة،
س : طيب وسن الحضانة ده لحد امتى؟
ج : سن الحضانة دلوقتي بقى 15 سنة للولاد والبنات ،، لكن كمان لما الولاد يوصلوا لل 15 سنة ،، القاضي بيخبرهم يروحوا يقعدوا مع أبوهم ولا يفضلوا مع أمهم ،، لحد ما البنت تتجوز والولد يبلغ سن الرشد اللي هو 21 سنة ،، وخليك عارفة أن لو القاضي خلى العيال معاك بعد سن الحضانة بيبقى مش من حقك تاخدي أجر الحضانة اللي هو جزء من النفقة،
وتحرم الأم من الحضانة إن كانت مريضة لا قدر الله مرض ما يحلهاش قادرة ترعى ولادها ،، أو إذا اتجوزت بعد الطلاق وترتب على ذلك إهمالها في رعاية ولادها،، واللي بيقدر ده المحكمة،، ولو شافت أن الأم ما بقتش قادرة ترعى ولادها ،، أو قصرت في رعايتهم،، بتتنقل الحضانة لأمها إذا كانت موجودة أو أم الأب،، وبعد كده تيجي الخالات الأول وبعدين العمات،،،
س : ينفع أخد نفقة من طليقي بعد ما اطلقت منه ؟
ج: لا طبعًا أنت بعد الطلاق ما بقتيش ليك علاقة بيه ،، يعني بقيتوا أغراب عن بعض ،، فهو يصرف عليك ليه ،، انما حقوقك لو كان الطلاق من خلع ولا على الإبراء ،، فليكي نفقة العدة ونفقة المتعة ومؤخر الصداق،
س : ايه نسبة العدة ونقطة المتعة دي؟
ج : نفقة العدة دي هيه النفقة إللي بيدفعها الزوج لمطلقته خلال فترة العدة ،، وده لو هوه اللي مطلقها ،، ودي من حق الزوجة طول فترة العدة ،، أما نفقة المتعة فدي بتحكم بيها المحكمة للزوجة إذا كان طلاقها مش بالخلع ولا بالإبراء ،، ودي بتكون من سنتين لخمسة ،، واللي بيحددها القاضي حسب دخل الزوج،
س : ولو المحكمة حكمتتي بالخلع ده يعتبر تنازل عن نفقة الولادة؟
ج : لا طبعًا نفقة الولاد ومصاريفهم على أبوهم ،، وكمان العلاج ومصاريف المدارس وده على قد مقدرة الأب ،، اللي المحكمة بتحطه في اعتبارها وهي بتحكم بالنفقة،
س : وهوه جوزي يقدر يطلبني في بيت الطاعة غصب عني؟
ج : اللي يقدر يعمله انه يبعتلك حاجة اسمها انذار طاعة،، وانت من حقك ترفعي قضية في المحكمة اسمها اعتراض على الطاعة في خلال 30 يوم من استلامك الانذار ،، وده بيبقى في محكمة الأسرة وتحكم المحكمة في هذه الدعوى إما بقبول اعتراض الزوجة أو برفضه،،،
وفي حالة الرفض يحق للزوج إذا ما استمرت الزوجة في رفضها العودة لمسكن الزوجية أن يقيم دعوى جديدة أمام محكمة الأسرة باعتبارها ناشزًا ،، وفي حالة صدور حكم لصالحه في هذه الدعوي تسقط حقوق الزوجة المالية،،،
وممكن يتقبل طعن الزوجة في حالة إن الزوج مش موفر لها سكن مناسب ،، حتى لو كانت راضية بالسكن ده في أول حياتهم،، مثلاً زي اللي بتتجوز مع أم جوزها،
وفي الحالة دي بيبقى على الزوج يوفر سكن زوجية وينفق على الزوجة حتى وهيه في بيت أهلها،
ولو الزوجة ما قدمتش الاعتراض خلال المددة المحددة يسقط عنها نفقة الزوجية
