دستور مصر الستات عايزة إيه؟

النساء مواطنات مصريات وبيشكلوا نص عدد سكان مصر وزي كل إنسان عايش في البلد دي .. لهم أحلامهم في الحرية والكرامة الإنسانية والعدالة الاجتماعية .. وهي المطالب اللي رفعها الشعب ستات ورجاله في الثورة المصرية

ولأن الستات اتظلمت كثير فعندنا مطالب تانية تخصنا كنساء, علشان مطالب الثورة في الكرامة الإنسانية تتحقق بجد في الشغل والشارع والمواصلات وفي بيوتنا كمان.

عايزين دستور يمنع ويجرم التمييز ضد البنات والستات في الشغل والدراسة وفي التعيين في المناصب الحكومية الهامة وفي القضاء وفي الأحزاب السياسية وفي البرلمان وكمان في بيوتنا.

ده حتى الدستور اللي شغالين عليه كل كلامه للرجالة .. ليه ما يقولش الستات والرجالة ولا المواطنين والمواطنات ده حتى القرآن بيقول: ” المؤمنين والمؤمنات الصالحين والصالحات” وكده يعنى .. همه بيقولوا لازم من الشريعة بس لما يكتبوا الدستور يكتبوه للرجاله .. كده يبقي بيختاروا من الشريعة اللي يعجبهم ويسيبوا اللي مش عاجبهم.

عایزین دستور يتعامل مع العنف ضد الستات علي انه جريمة والقانون يعاقب عليها .. ويحمي البنات والستات اللي بيقع عليهم العنف، لأن مش من حق أي إنسان في الدنيا أنه يضرب أو يهين أو يأذي إنسان تانى سواء الأذي ده كان علي الجسم زى الضرب أو علي النفس زى الإهانة والسب والتحقير أو عنف جنسي زي التحرش وهتك العرض والاغتصاب ومهم كمان يكون في طريقة تحقق الأمان للبنات والستات.

ما هو العنف بقي كتير قوى لدرجة مخيفة .. وبيحصل لنا واحنا ماشيين في الشارع ولا راكبين المواصلات العامة وفي المتاجر والأسوق وكمان جوه بيوتنا وده مؤذي لصحة ونفسية الستات ولازم ينتهى .. والدستور لازم يقول ده بصراحة ووضوح ويعاقب عليه حتى لو حصل جوه بيوتنا.

عايزين الدولة تمنع بجد كل العادات اللي بتضر بصحة البنات زى الختان وتزويج القاصرات .. وزواج المتعة والمسيار .. لأن ده مش بس جريمة عنف ضد البنات لأ ده كمان تجارة بالبني آدمين.

والأطفال اللي زى ولادنا اللي الزمن جار عليهم واشتغلوا وهمه لسة صغيرين ولا اللي مالقوش حد يحن عليهم فعاشوا في الشوارع .. الكلام ده ما عدش ينفع ولا نقدر نسكت عليه بعد الثورة .. الدستور لازم يحمي الأطفال دول ويعلمهم ويسكنهم ويضمن لهم حياة إنسانية .. يعنى من الآخر ما يبقاش الحكومة والزمن علهم.

وعايزين يكون في نوادي .. الولاد والبنات يغلبوا فيها ويتعلوا الرياضة والفن والموسيقي ويكون فيها مكتبة علشان ولادنا يقروا ويتنوروا.

مش عايزين الفقر ولا المرض يحولنا لعبيد. يعنى الدولة لازم تضمن لينا ولولادنا خدمة طبية وعلاج مجاني .. الكل الستات حتى اللي مش بتشتغل بره البيت .. ولا اللي بتشتغل باليومية أو في الزراعة.

ولازم علي الدولة تضمن معاش للستات اللي مالهاش دخل ومسئولة عن أسرة .. ما يكونش 100 جنيه زى ماهو حاصل دلوقت .. نقصد معاش يضمن عيشة كريمة للست ولعيالها ويكون قريب من الحد الأدنى للأجر اللي بتحدده المحكمة.

نفسنا بناتنا وأولادنا يتعلموا تعليم مجانى وحقيق بجد .. زى التعليم اللي في الدول المحترمة اللى يبنى لبلدنا مستقبل يخلي مصر من الدول المتقدمة .. ومش عايزين البنات تسيب التعليم المصاريف ولا تكلفة الدروس الخصوصية .. ولا لإن فرص الشغل قليلة .. ولا زى ما بيتقال المهم الولد لأن البلت مسيرها للجواز .. الكلام ده عيب يستمر .. البنت لازم يكون لها نفس الحقوق زى الولد بالتمام والكمال.

یعنی علشان يبقي فى مساواة .. نبقى محتاجين الستات تتوظف وتكون الدولة مسئولة عن تدريبهم وتطوير مهاراتهم بشكل مستمر. واللي من البنات عايش في الريف ولا بتشتغل في الزراعة لازم يكون عندها ميه للري .. وتعليم خاص بتحسين الأرض والمحصول .. وحماية للمواشي من الأمراض اللي بتموت الحيوانات اللي هي رأسمال الأسرة.

مهم خالص لكل الناس .. إن كل أسرة يكون لها سكن صحي .. تدخله الشمس وفيه ميه نقية وصرف صحي وكهربا .. ما ينفعش ملايين الأسر تعيش في العشش والمقابر والعشوائيات بعد كده .. أمال إحنا عملنا الثورة ليه ؟

عايزين شرطة تخدم الشعب .. مش تكون سيف علي رقبته .. مش عايزين الشرطة تدخل بيوتنا بدون استئذان وتهينا ولا تهين ولادنا أو أزواجنا .. واللي يعمل كده لازم يتعاقب هوه واللي اداه الأمر .. ولازم كمان يبعدوه عن العمل مع الجمهور .. لازم الدستور يقول بصراحة إن التعديب أو إهانة الناس جريمة وكمان مخلة بالشرف.

عايزين القانون يتطبق علي كل الشعب من الغفير للوزير .. مش واحد ينضرب لما يموت علشان غرامة بعشرين جنيه وواحد يهرب بعشرين مليار جنيه.

وكمان لازم يكون في عدالة في توزيع الدخل مش واحد يقبض 100 جنيه في الشهر وواحد يقبض 100 ألف جنيه في الشهر.

والضرايب هي كمان لها حكاية .. الغنى بيتعامل زى الفقير .. والعدل إن اللي دخله السنة يساوى الحد الأدنى اللي تحدده المحكمة يكون معفي من الضرايب .. وبعد كده الضرايب تزيد مع زيادة الدخل.

عايزين نجيب نواب الشعب ورئيس الجمهورية بإرادتنا .. لا بالتزوير ولا بالرشوة ولا يسبب نقص المعلومات .. ومهم الإعلام يكون صادق ويدي كل مرشح فرصته علشان يشرح لنا ناوى يعمل ايه وحيعمله إزاي وفي زمن أد ايه .. علشان نكون علي نور ونعرف نحاسب اللي بيخلى بينا. ومهم يكون نص مجلس الشعب ولا مجلس الشورى من الستات ومفروض كمان الجمعية اللي بتعمل الدستور يكون نصها ستات.

عايزين نقول رأينا من غير ما نتعرض لمشكلة .. نكتب في الجرايد ولا النت .. نرسم .. نتكلم في التليفزيون .. نعمل اعتصام ولا إضراب ولا مظاهرة .. نجتمع مع ناس تانية ونعمل جمعية أهلية ولا نقابة ولا رابطة .. مش هي دي الحرية ؟

الدستور ده العقد اللي بينا وبين الدولة ولما يكتب عقد بيت ولا حته أرض بندقق ونسأل المحامين ونعمل ضمانات .. يبقي من باب أولي ندفق في الدستور ونراجع ونسأل ونرفض اللي مش موافقين عليه .. لأن العقد المهم ده هو اللي بيضمن لينا حقوقنا .. يعنى لازم الدستور يتكلم علي حقوق كل الناس وكمان يكون فيه جزء بيتكلم عن حقوق الستات والأطفال ويحط الضمانة اللي تضمن إننا نعرف نتمتع بالحق ده .. مش شوية كلام وحبر على ورق وخلاص.

الست زى الراجل .. والدستور لازم يضمن وصول الحق لكل الناس .. الراجل والست .. المسلم وغير المسلم .. الأبيض والأسمر .. الفقير والغنى .. الصعيدي والنوبي والسيناوى والبحراوي والقاهري

كلنا مصريين .. كلنا زى بعض

عيش.. حرية.. كرامة إنسانية.. عدالة اجتماعية.. مساواة حقيقة